الاثنين، 27 ديسمبر، 2010

رسالة من امريكا !


أتتني رسالة الكترونية من الولايات المتحدة و محتواها :
( hi, i saw your photo on that site.. ( i think your cute and beautiful) anyhow id love to chat with you sometime on windows live messenger my name there is....... )

:
ترجمتها :
مرحبا , شفت صورتك بذاك الموقع واعتقد انك ( ظريفة وحلوة ) المهم أبغى ادردش معك بأي وقت على ويندوز على ايميل ......

:






:
ولنفرض ان الشيطان غرر بي وخلاني اصور هاه بس اصور 
وغرر بي اكثر وخلاني احطها باللاب توب 
وغرر بي كثير كثير وخلاني احطها بالموقع اللي تقول عنه

قسم بالله لاتكره كلمة حلوة وكيوت من ام ام جابتها
بسألك بس 

هل هي صورتي لما ابوي يقومني من النوم ويقول قومي صلي وسوي فطور يالله صحصحي 
انت شفت وجهي وقتها , شفته ؟!!! 
طيب طيب هل هي صورتي يوم اصحى واغسل وجهي والعن ساعة تخرجت فيها وجيت عاطلة تسوي الفطور
وهي عارفه انها المفروض ترقد هالوقت , يوه شفت وجهي بس من بعيد , بدون ماتقرب ؟!!

وبعدها شفت وجهي لما ارجع انام ثم يرجع ابوي يصحيني قومي صلي الظهر ثم سوي الغدا , شفت ام وجهي بس ؟!!
واصلي ثم اطبخ وعيوني تدمع من البصل وكشتي ياكافي واخواتي يجون يسلمون علي مدري كيف جاتهم الشجاعة مدري المهم يسلمون لكن يقولون والله ان حنا شاطرين اليوم < كله ولا انفخ ولا اسوي كذا بعيوني عليهم

طيب طيب شفت وجهي لما اخلص من الاواني والكناس والغدا واروح امشي بالحوش والسماعة بأذني وابوي يناديني الين يجي الين عندي ويسميني يا ( .... اسم عجوز فقدت سمعها مؤقتا حينما امتلأت أذنيها بالقش نتيجة لنومها مع غنمها وقام الدكتور بإخراج ماتراكم داخل تلك الأذن وسط صراخ وعجب حتى الحشرات يبست بداخلها قسم ! ) ويقول لي سويت لي شاهي ؟ شفت وجهي وقتها ؟!! 

ماعلينا طيب شفت وجهي لما ارجع للحوش بعد ما اخلص من شاهي ابوي واجلس اكلم نفسي واضحك 
طبعا وانا اتخيل نفسي (نجمة هوليوود ممثلة ومغنية وراقصة ومنتجة وبجرب الإخراج قريب و حلوة الا تهبل والوح بيدي بالجو تهدئة لجمهوري اللي بجد بجد اقلقني ماخلاني اخلص غنيتي ) , شفتني وقتها ؟!!

وبعد الجري والمشي اتذكر الدجاج ماعطيتها باقي الغداء واروح بكل شهامة وافتح باب المزرعة وتجري علي متخيلة نفسها جرو , شفت وجهي وقتها ماعليك من وجهي سمعت صوتي بس ؟!!!
< ياكرهي لها 
واقفل الباب وارجع واتخيل نفسي (نجمة هوليوود نفسها السابقة الذكر ) وهم يصوروني وانا اغذي دجاجي وانا الوح لهم بإشارة كبيرة لتواضعي ( الله يخسهم هالبابارازي ) , وتشوفني امي وتأشر لي يعني تعالي واجيها وتقول انتي تكلمين نفسك وتضحكين ؟ وانكر بتاتاً وكل ذلك من وسواس الشيطان , شفت وجهي وقتها ؟!!

وبعد الجري والمشي اخذ شاور واحاول تطبيق حلمي صوتيا أبدأ أغني :
There's no black and white
Only you and me
On this endless night
And as the hours run away
With another life

طاخ طاخ طااااااخ < ايوه ؟!
يابنتي اعوذ بالله مهب زين تغنين في الحمام , (الله يكرمكم بس قالوا ماحد يكتشف موهبته الصوتيه الا فيه ! ) , زين زين .. 

واطلع وانا محطمة الأمل اكيد فأكثرهم قوبلوا بالمعارضة واروح لغرفتي واعتقد انهم قدموا لي دعوة
في برنامج ( so you think you can dance ) برواية أخرى ( من جدك تعرف ترقص ؟ )
وابدأ بالرقص أنا نجمتهم الهوليودية الـ مبهرة احم  , شفت وجهي وانا ارقص الهيب هبوب ؟
شفته , ؟!!

وبعدها اروح على الميزان (يعني بيتحول الوزن بثواني ! ) المهم بشوفه ليطمئن قلبي , واروح اجرب الجينز اللي معي من 3 سنوات واقول باكر بقدر اقفله , ويجي باكر اقول السنة الجاية ومنها الين الحين , شفت وجهي وقتها ؟!

لكن بقفله قبل شهر 4 < وبشوفه علي بالعيد 

طيب طيب شفت وجهي بعد المغرب ولما يجي وقت المراجعة , شفت وجهي يوم اقول لاختي ارفعي باليد واحد 
مو على الآحاد على العشرات وبرضه تغلط , يوه انتبهت لخشمي بس ؟!
واجي لاختي اللي بأول واقول سمعي لي وتغلط ولا اشوف لها تأتأة , أو اختي اللي بسادس وتغلط بالتقريب او التحليل للعوامل الأولية , أو اختي اللي بأول متوسط وتغلط لي بمعادلات من الدرجة الأولى أو اخوي اللي بثالث متوسط واحسب معه زوايا بدائرة ربي ضيق عليها ودخلت داخل رباعي < طيب انا ويش دخلني

شفت ووووووووووووجهي لما اخلص منهم كلهم ؟!

طيب طيب لحظة مابعد خلصت , انت شفت وجهي لما بعد هالمذاكرة اروح اسوي عشا ولا الاقي حد يتحمل مسئولية اختيار الطبق وكلهم يقولون بكيفك ؟!
واذا سويته قالوا والله مالنا نفس فيه !!
انت سمعت فحيحي  < ليه حية هههههههههههههههههههههه

وبعدها ارجع امشي بالحوش لما اخلص التنظيف وكل ابو شي وعشاي هالبيضة المسلوقة وارجع امشي في الحوش الين 11 والاقي شباك عمي مفتوح , بالله على ايش تبون تطالعون ؟!!!

لايسمعني ابوي يروح يسكر الحوش من فوق من غير اكتفاء بالجدر الفاصل الذي يصل ارتفاعه الى حد ساعتنا الخربانة بمكة المكرمة < 

طيب شفت وجهي لما اروح ابي انام وأمي تقول تعالي وتجلس تفرك وجهي بكل ما أوتيت من قوة مرة بخيار مرة بزبادي المهم كل ماتصل اليه الأصابع , شفت وجهي هذيك الحزة ؟!!! 

واجلس بالصالة اتفرج بإنتظار انه يجف ولما احس جف اغسله واجفف وجهي و اروح ابي انام تقول امي تزيني مالت عليك يا .....
(اسم شايب ضاع بالبر ورجع لأهله بعد اسبوعين وماتتخيل كيف كان شكله ) , كان بنتي رجال في ذمتي , مدري متى بتهتمين بنفسك قلنا انها خلاص عطلت بتنتبه على نفسها الا قامت تسوي رياضة في الشمس , ............ !

شفت وجهي وانا محطمة كذا !
وهذا واذا كانت بس صورة حديثة ( وعلى قولتك تعتقد انها كيوت وحلوة ) , عاد لو كانت صورة قديمة !
صدقني لاتتمنى انها خمتك الطيارات بدال الأبراج  







عاشوراء الماضي


كان عاشوراء الماضي يوافق يوم مولدي< يابنت الحلال حفظنا من كثر ماتعيدين ههههه
المهم المهم !

نهضت على أمل التصبيحة بكل عام وانتي بخير , يا سعد هاليوم اللي جيتي فيه على هالدنيا
ولكن !
قالوا لي  : سوينا فطر على الخفيف مانبي شيء ثقيل !

طيب طيب
وللأمانة قامت والدتي بمد لي يد وقدم العون (حفظك الله )
وبعد الإنتهاء والإفطار وصلاة المغرب والعشاء سألتني :
( إذا كنت راغبة للذهاب إلى التسوق وترك ~ الآي بود اللي داعيه عليه امه ~ في خطوة جادة ؟ )
قلت لها بفهم خفي لتركي أختار هديتي بنفسي 

تسير بنا الطرق وندنو ندنو (آوه ) امي ذاهبة للسوق الشعبي والعطارين !!!
< ايش وداني بس

قالت امي تعالي ودتني للعطار قالت اختاري لك اعشاب مفيدة نسوي لك بها خلطات
يابنتي كانك صبي < 

والله عرفت ان شات بداية بيقلبها علي 
قالت لي البنات يتزينون ليه اما انتي
والله يمه اني مااااااااحب
شعري وجهي بشرتي تكتئب لاحطيت عليها شي <
المهم بدف ونفخ عند المحل قلت خلاص هاتي لي اي شي < قالت ايه تعودتي انا اللي اشتري لك
وتهاوشني يالله يمه 

طيب طيب كركم < ياقلب لااااتحزن 
وووو صابونة غار <
قالت امي بكلمة تكسوها الفرح < ايه هذي خلطة بياض الثلج 
لحظة باقي لك جلسرين بناخذه من الصيدلية  

ووجهي كذا >
المهم وبعد ماخلصنا خذتني لمحل يبيع العبايات قالت نقي لك وحدة
الاقي فيه عباية بلاك بيري وان 95 وايفون والكثير الكثير  !
احلللى !!

قلت امممم ايش ودك انتي يمه < هنا مقدر اقولكم من جد استاهل النفخ
طيب ماعرف انقي لي والله ماعرف

انتهى اليوم على خير وركبنا السيارة رايحين للبيت < وانا من جد مبسوطة 
قالت هذي هديتك لاحد يقول لي اني مانتبهت ليوم ميلادك

قسم بالله يمه هذي بس تسوى عندي الخلطات والعباية والشيلات 

شكرا لك